UGC આયોજિત ટીચર ટ્રેનિંગ પ્રોગ્રામ્સ નું MMTTC – રાજકોટના સંદર્ભમાં વિશ્લેષણ

Abstract

ઉચ્ચ શિક્ષણની ગુણવત્તા વધારવા માટે તેમજ ઉચ્ચ શિક્ષણ સાથે સંકળાયેલી યુનિવર્સિટીઓ અને તેને સંલગ્ન કોલેજોના અધ્યાપકોની વ્યાવસાયિક સજ્જતા વધારવાના  ઉદ્દેશ્ય થી યુજીસી એ 1987 માં  એકેડમિક સ્ટાફ કોલેજની સ્થાપના કરી હતી. જેને આજે આપણે UGC: MMTTC (HRDC) તરીકે ઓળખીએ છીએ. પ્રસ્તુત સંશોધન UGC: MMTTC  રાજકોટ દ્વારા આયોજિત વિવિધ ટીચર ટ્રેનિંગ પ્રોગ્રામ્સ અને અન્ય પ્રવૃતિઓનું વિશ્લેષણ કરવાના હેતુથી કરવામાં આવ્યું હતું. આ એક વર્ણનાત્મક સર્વેક્ષણ હતું. જે ગુણાત્મક અભિગમ થી હાથ ધરવામાં આવ્યું હતું. જેમાં વ્યાપવિશ્વ તરીકે UGC: MMTTC – રાજકોટ દ્વારા 1987-2024 ના સમયગાળા દરમ્યાન આયોજિત ટીચર ટ્રેનિંગ પ્રોગ્રામ્સ અને અન્ય પ્રવૃતિઓની પસંદગી કરવામાં આવી હતી. વ્યાપવિશ્વ એ જ નમૂનો હતો. પ્રસ્તુત સંશોધન માં ઉપલબ્ધ દસ્તાવેજીય માહિતીને માહિતી પત્રકની મદદથી વર્ગીકૃત કરવામાં આવી હતી. ત્યારબાદ તેનું MS- EXCEL ની મદદથી પૃથક્કરણ કરવામાં આવ્યું હતું. જેના તારણો મુજબ UGC: MMTTC – રાજકોટ દ્વારા વર્ષ 1987-2024 ના સમયગાળા દરમ્યાન કુલ 436 ટીચર ટ્રેનિંગ પ્રોગ્રામ્સ અને અન્ય પ્રવૃતિઓનું આયોજન કરવામાં આવ્યું હતું. જેમાં 128 ઓરીએન્ટેશન પ્રોગ્રામ્સ, 247 રિફ્રેશર્સ કોર્ષ, 35- શોર્ટ ટર્મ કોર્ષ અને 26- અન્ય પ્રવૃતિઓ નું આયોજન કરવામાં આવ્યું હતું. જેમાં કુલ 16106 લોકોએ રજીસ્ટ્રેશન કરાવ્યું હતું. 2012-2024 માં સમયગાળામાં 3429 પુરુષ અધ્યાપકો અને 1762 સ્ત્રી અધ્યાપકોએ તેનો લાભ લીધો હતો.